一起寫吧！: alex Archives

August 16, 2002

Alex《電車》

電車……第一個感覺，就係古老。無電車，香港的歷史就少了一個好重要的話題。

每一次坐電車，都會好興奮，因為當年家住荃灣，與電車接觸的機會差唔多係零，幸而姨媽姨丈家住港島，有機會坐電車。

每一次由中環地鐵站行出遮打花園方向，都會聽到「叮叮叮」的電車聲，實在清脆，實在難忘。亦眼見電車上的廣告，好似「保濟丸」、「位元堂」、「雞仔牌羊毛內衣」等等，迄今依然記憶猶新。

每一次到於中環遮打花園對出的舊希爾頓酒店內的店舖找姨媽姨丈，到了放工時間，就會到希爾頓對出的電車站等候電車，往姨媽姨丈的家。由中環到炮台山，途中經過金鐘的金鐘廊，太古廣場，到灣仔的大友商場，銅鑼灣市中心，祟光百貨，麥記等等，之後到了天后廟道，再到炮台山就落車，途中有乘客上車，落車，上車，落車，當然有人落車的時候，我都會講句「唔好意思」，當然因為一個肥仔係電車裡都會有點不好意思，阻礙乘客上落車。

每當一個人於港島區的時候，除了可以到灣仔，銅鑼灣遊逛外，乘電車亦係一個好的選擇。於銅鑼灣遊逛完，可以乘電車作「遊車河」，由銅鑼灣，到灣仔，金鐘，中環，到了中央街市，甚至上環街市，之後可以再由終點站坐起，由上環，到中環，於立法局遮打花園落車，再乘地鐵，這一個「遊車河」的活動都只不過花費數元，比乘地鐵，巴士還要便宜。

小時候有一個小小的願望，就是想做電車司機，因為電車本身有一定的歷史，自少已很喜歡，再者於電車內亦可以目睹唔同的乘客，由上車到落車的情景，再者於繁忙時間，於車上目睹街上的人都等著自己駕著的電車，十分有自豪感。不過人大了，願望亦會改變。

電車的確係香港的其中一個標誌，以及……亦為香港的一個歷史見證。

Posted by ruofei at 12:00 AM | Comments (0)

September 10, 2002

Alex《一個人的時候》

一個人的時候，獨自在家中目不暇給地坐係窗前望著對出的大草原，感覺……自然。

一個人的時候，獨自一個走到大學的圖書館睇書，做research、溫書，感覺…… 辛苦。

一個人的時候，獨自在家中睇電視劇，每星期都追睇「皆大歡喜」，感覺……開心。

一個人的時候，獨自到Sport Center做健身，感覺……爽快。

一個人的時候，跟電腦上ICQ正上網的朋友聊天，感覺……快樂。

一個人的時候，獨自到City Mall逛一逛，感覺……輕鬆。

一個人的時候，獨自坐在宿舍露台外，感覺……無聊。

一個人的時候，到朋友家談天及玩，感覺……興奮。

一個人的時候，獨自到戲院睇喜歡睇的電影，感覺……好睇。

一個人的時候，最好於床上睡一睡，感覺……舒服。

最後，
一個人的時候，電腦正播著郭富城的「一個人的時候」，感覺……

Posted by ruofei at 12:00 AM | Comments (0) | TrackBack

September 24, 2002

Alex《茶餐廳》

小學的時候，茶餐廳必得成為個人最愛到的地方，以前住在荃威花園，那兒有一間茶餐廳──「嘉美茶餐廳」，以前一到那兒我就唔客氣，「唔該！菠蘿飽加凍華田，再多一個菠蘿飽行街」，這係早餐的指定動作，一做就做足一個小學，六年不變。到了午餐，媽媽唔整午餐，就到「嘉美」整個午餐，亦係指定動作，唔使想，「唔該！午餐加凍檸水，要白湯……」。晚餐就少去，不過一旦要去的話，就唔會有指定動作，不過都相若，一係就「唔該！晚餐加凍華田or檸水，要白湯……」，一係就「唔該！焗豬扒加凍華田」。

到了中學時期，去「嘉美」食的機會比以前少，因為始終都會係學校附近的茶餐廳食午餐。在中學的五年間，去「嘉美」的次數真的很少，不過如果一去「嘉美」，就會叫粥食，那兒的粥都okay的，不過我就劃一，「唔該！肉丸粥……」

過了這麼多年，已經搬離荃威花園已有六年啦，亦即係，我已離開了「嘉美」六年，無錯，我一返到荃威花園找我姨媽時都會少去「嘉美」，因為……。去過其他的茶餐廳，都已覺得「嘉美」唔係心目中失去了當年小學時期的重要地位，再者，唔同人經手，少了相識的伙計談天，結果已被我遺棄。

「嘉美」已遺棄，取而代之的係……無，因為已好少去茶餐廳了。

Posted by ruofei at 12:00 AM | Comments (0) | TrackBack

October 08, 2002

Alex《女裝衣履》

女裝衣履，講真，都幾想試下，身為一個男子身，一定沒有機會穿著女裝，眼見其他女人及媽媽穿著裙子，有時真的很有興趣嘗試一番，不過知道身為男兒身，一定沒有這個機會……

其實自己沒有對女裝有特別的感覺，何解？？因為……女裝都只係衫一件，與男裝無任何分別，都係衫一件，但慢慢仔細一想，會有以下的感覺……

首先，女裝俾我的第一種感覺，會好有襯托的成份，尤其「靚女襯靘衫」的定律我相信都唔會錯的。

再者，有些女士們都會穿著一些高貴及性感的衣履，我會覺得為何女士們會如此大膽穿三點式？？穿低胸裝？？男士們想如此都沒有這機會。

所以……我會想起一個問題，如果男子穿上女裝會有甚麼出人意表？？女士穿男裝完全唔係一個問題，不過，若男子穿上女裝……令我想起《百分百感覺》電視劇內的森美……

Posted by ruofei at 12:00 AM | Comments (0) | TrackBack

October 22, 2002

Alex《巴士》

每朝早上，一早起身，返學的時候，都一定要搭巴士，39M、39A、30X，總之去到荃灣地鐵站就得。手上掏出2.4元的輔幣，輔幣的「噹噹」聲進入了收銀機，「叱吒」兩聲，銀就係機下的錢箱，待回廠時收回。

巴士的聲音，對一個巴士迷來說十分易聽得出，勝利二型、三叉戟、Leyland 9 米、Benz雙軸等等的聲音，都已係腦中，永不忘記。

巴士的類型，更加唔需要想就講得出。39M，一定係行MCW 12米，以前行丹拿珍寶；1A，所有最新的冷氣巴士都會首先服務此線；仲有2號，白水箱，香港舊款的單層巴士；丹拿A型，香港首部雙層巴士，車牌 4961，路線係3號，由佐敦道碼頭至竹園（現在3號已停止服務）……

邊種巴士最好坐？Man、Dennis Olympian、Neoplan Centroliner……最唔好坐？首選勝利二型，車身又高，位又窄，車內又矮，係巴士之中的極品（成日出意外的極品），但外型係勝利二型取勝。

巴士站，香港多的是，由最普通的站，到現在有蓋連廣告巴士站，總比之前的多元化，但不及舊有的如此經典。電腦化，多元化，都不及舊有古老的巴士站吸引。

巴士車頭的樣子，十分有趣，大大個口係車頭，寫著「尖沙咀碼頭 1A」，又或者「灣景花園至荃灣地鐵站（循環線） 34M」，十分得意。窗下的英文字母，K是九龍灣、U是元朗、L是荔枝角、S是沙田，怎麼意思？車廠是也。

車號的號碼，逢3個數目字，2字頭是空調、9字頭行西隧、6字頭行東隧、1字頭行海隧、8字頭馬場線、A字尾通常去碼頭、M字尾就去地鐵站、R及S字係特別線、K字係火車站線、N字尾就係通宵巴士；仲有，A字係頭就由市區去機場、S字頭係東涌去機場的內線、E字頭係由市區往東涌……而由數字1號至29號的巴士路線，都係服務九龍市區內的，由30號至99號的巴士路線，係新界區內服務以及新界至九龍服務的路線。

巴士公司，九巴、龍運巴士、中巴、城巴、新巴、新大嶼山巴士……全香港都是巴士。

巴士模型，更是現在值得收藏的收藏品，多款巴士都有出模型，成為大家巴士迷的心頭好。

巴士廣告，真係數之不盡，「保濟丸」、「川貝枇杷膏＋楊千嬅」、「位元堂」、「黑人牙膏」，甚至唔知大家記唔記得「超載屬違例　乘客請合作」的字眼係巴士出現？唔信？大家搵搵圖片啦，出現過於舊款巴士「丹拿珍寶」的巴士中。

究竟以上講緊乜野巴士公司的巴士？講緊的是九龍巴士（1933），邊個係這個巴士迷？暉暉是也。

Posted by ruofei at 12:00 AM | Comments (0) | TrackBack

November 08, 2002

Alex《拖鞋》

拖鞋，一對家中人人必有的鞋，人字拖又有，有按摩的都有，乜款都有。

由細到大著拖鞋可以說係好重要的東西，於家中，無一對不得，有時過鄰居家借鹽糖豉油，著對拖鞋輕輕鬆鬆，無拘無束，方方便便。

出街的時候，阿媽教落，唔俾著拖鞋出街，點解？對拖鞋骯髒，點可以在家中著呀，家是很乾淨的嘛……問心，自己家有我係度點會乾淨。

今時今日，點會真的不穿拖鞋出街的呀……出街食宵夜，到朋友家，甚至返學都會穿拖鞋，何解？都係果一句，輕輕鬆鬆，無拘無束，方方便便，仲有一樣……簡簡單單。

Posted by ruofei at 12:00 AM | Comments (0) | TrackBack

November 24, 2002

Alex《心中有鬼》

心中是否有鬼，可有唔同的答案存在。若心中有鬼，會發生何事……？若心中沒有鬼，又如何……

心中是否有鬼真的很難去埋著腦去思考，難道自己在心中真的有鬼存在？難道自己的身體由另一樣的靈體控制著？又或者可以這樣說，究竟會不會是自己心有不惻，只是自己心有牽掛？一一的疑神疑鬼的感覺都會被解開……

鬼，男鬼也好，女鬼也好，會不會影響到自己的心靈都係其次，最主要是自己心中是有自己抑或被其他的「鬼」控制著，這一切的答案都只有自己才知道。

你問問自己心中有沒有鬼？我，當然……

Posted by ruofei at 12:00 AM | Comments (0) | TrackBack

December 09, 2002

Alex《暗戀你/妳》

暗戀，人人都有，你有、我有、大家有，電影中的男女主角都有暗戀，聽落暗戀都已成大家發生過的階段。

一日，陳先生跟我說道：「究竟知唔知道暗戀的感覺？」之後答到：「暗戀，係一種……令自己開心，亦可以令自己傷心的感覺。」陳先生問為何，我反思了很久，不禁想起一件事。自己都曾經暗戀過，曾經對一個女仔暗戀多時，於中學時代，反想到今時今日，是否很開心？的確很開心，但是否很傷心？亦沒有錯。為何？開心當然是找到了自己喜愛的女子，唔開心的是她是否你的真命天子，未知之數，可能只係曇花一現的小故事，又可能只是一個「無顏色的夢」，亦可能只是一場風花雪月的事。有一天，朋友跟我聊天的時候，最終才知道，在這一場無顏色的夢及風花雪月的事背後，發覺原來有不可思議的無言結局……

迄今，當有朋友問道有沒有暗戀女子，當然都會直接答到有抑或無，有好正常，無亦好正常，這是人必經過的階段，不是說沒有暗戀就沒有大過，不正常，而是異性也好，同性也好，都有自己暗戀的對象，深愛的對象，這是人必過的一生。

現在的你或妳，有一個暗戀的對象嗎？她／他是否你／妳的真命天子？但願珍惜眼前人，不要放過每一次得到的好機會，不要好像陳先生的朋友般，錯過了大好機會。

Posted by ruofei at 12:00 AM | Comments (0) | TrackBack

December 23, 2002

Alex《又到聖誕》

「又到聖誕，又到聖誕，又到聖誕就好鬼咁嘆，Santa Claus is coming to town ……」這一首聖誕歌當然係為左自己而作的啦，唔係到聖誕，又點會嘆！

過了廿三年聖誕，每一年都有不同的感覺。第一年，聖誕係乜都未知；第二年，都仲未識；第三年，都好似仲未知……到了第十年，開始屈老豆阿媽買聖誕禮物，一年係鞋，都唔知幾多年係玩具，最記得一年係聖鬥士星矢，都無左囉！

年年都與家人一齊過，悶唔悶先？悶當然唔悶，「玩得開心，食得開心，就係聖誕！」嘛。今年身在澳洲的我終於可以同朋友過聖誕，太好啦，終於可以走出五指山，係沙漠中飄飄然咁玩，仲唔正！當然身邊係另一半仲開心，咁現在的時間有與無都無分別，有得玩就得！

最後，剛剛收到電話，來自已返香港的細佬打給我，他問我想要乜聖誕禮物，果一刻我十分感動，一來他依然年年送給我，而我就唔記得左「又到聖誕，又到聖誕」的歌仔又要唱啦！同埋我都未想到買乜俾佢添！這樣的大佬，大家有無見過……

Posted by ruofei at 12:00 AM | Comments (0) | TrackBack

January 11, 2003

Alex《空想生活》

「一人有一個夢想」，當然人人都有夢想，都有自己想的生活。但往往自己想的就唔一定會得到，而得到又未必滿足，何哉？

今天過到自己的生活，其實十全十係由父親母親的厚愛，以及自己的幸運，才能得到的；但將來的生活……

從前於腦海中就有自己想過的生活。房間？車？妻兒？都有為自己而想過，因為這始於自己想擁有以及希望會得到的生活。但最滿意及理想的生活，就是有一個完完整整的小家庭，以及一個安穩的生活。這才是空想的生活。

Posted by ruofei at 12:00 AM | Comments (0) | TrackBack

February 16, 2003

Alex《生命終結前的廾四小時》

一日，傻暉問傻強：「傻強呀傻強，如果得番廿四個鐘你用，你會點用呀？」傻強唔夠十秒就答：「你真係當我傻呀，邊會咁快世界末日呀！」傻暉之後好快說只是問問。傻強之後傻下傻下咁想了一想，他之後說：「我會……我會……我會……」傻暉即刻二話不說：「你只會想識女仔之嘛，想同你鍾意既女仔一齊乜乜之嘛！」但傻強就說：「這係我的其中一個答案，但他最想的是……走到他已去世的父母靈位前，與他們一起度過這二十四小時，就於這一日，快快樂樂與家人一起，從不後悔。」傻暉聽完後感動起來，還說原來傻強還是一個正常有孝心的男人。傻暉還問道：「那現在你家人在『那兒』呀？」傻強說：「係家中囉！」傻暉說：「你家中？我來過你家呀，都唔見有？」傻強說：「乜呀，我老豆老媽一直都係他們家中，而家應該開緊檯添，一陣仲約左我去撐檯腳，仲話去睇《無間道》添！」傻暉即刻無聲出：「……」

Posted by ruofei at 12:00 AM | Comments (0) | TrackBack